Hver á sér fegra föðurland var samið um hásumar þegar ekki var eitt ský á himni

Þetta var nú aldeilis merkilegur dagur hjá Biddunni. Vaknaði um hádegið og bjóst kannski við Ingu í kaffi. Kannski þó ekki, hún gat verið farin í bæinn. Meira hvað fólki liggur á! Átti líka hálfpartinn von á Lilju, hún skildi dót eftir sem hún ætlaði að sækja.

Allavega ástæða til að koma sér á fætur. Og um að gera að njóta veðursins, ekki eitt ský á himni.

Nýslegið tún Egilsstaðabóndans rétt fyrir neðan blokkina sem ég bý í. Ég fæ alla kosti þéttbýlisins en um leið kyrrðina og fuglasönginn og hreint undursamlegt útsýni eins og ég væri lengst uppi í sveit. Og allt svo hreint og tært.

Hvernig var aftur með hana Svanhildi, ætlaði hún ekki að vera í bústað rétt hjá Egils um þetta leyti? Hvorki Inga né Lilja gerðu vart við sig en það gerði Svanhildur. Og svo kom hún í kaffi með karlana sína þrjá, yndislegt alveg.

Þau voru ekki fyrr farin en Dísa hringdi. Og svo kom hún ásamt Agli syni sínum sem ég var búin að fá til að skrúfa saman nokkra stóla fyrir mig, enda talsvert handsterkari en ég. Á meðan við Dísa drukkum kaffi á svölunum og sleiktum sólina skrúfaði Egill 48 skrúfur í nýju eikarborðstofustólana mína, skrúfur sem ég var búin að rembast við en gekk ekki neitt, eikin er svo grjótharður viður. Hann var bara snöggur að þessu, strákurinn. Mikill léttir.

Og svo dúkkaði hún Karen upp á Skype. Eða réttara sagt MSN en næst munum við tala saman á Skype, vonandi, ég þarf að útvega mér heyrnartól. Ég hafði ekki tíma til að tala við hana núna, það var kominn tími til að gera sig klára fyrir tónleika. Og það enga smá tónleika.

Ég er orðin eins og hálfgerð grúppía hjá Árstíðum, þetta eru þriðju tónleikarnir sem ég fer á með þeim og alltaf skal ég knúsa þá og kreista. Nauðsynlegt alveg:P Og núna á ég líka diskinn með þeim, útkrotaðan.

Svavar Knútur segir að ef sama hlutfall íbúa í Reykjavík og á Egilsstöðum hefði mætt á tónleikana, þá hefðu þetta verið svona 12 þúsund manns. Sem betur fer voru nú ekki svo margir, þá hefði ekki náðst þessi yndislega stemmning.

Við Dísa kíktum til Lóu og Sigga eftir tónleikana og leyfðum þeim að heyra diskinn, bara svo að þau vissu hverju þau misstu af. Og nú er ég komin á næturvakt og hlusta á Árstíðir. Snilld.

Hellisheiði eystri, Lagarfljótið og heyrúllur Egilsstaðabóndans, séð frá útidyrunum mínum um hálfþrjú að morgni 8. júlí.

Ég veit svosem ekkert hvenær Hver á sér fegra föðurland var samið. En á svona degi verður maður bókstaflega ástfanginn af landinu sínu. Það hefur sennilega verið hugsunin á bakvið þessa yfirskrift á tónleikaferðalaginu þeirra strákanna.

Þetta var einn dagur í lífi Biddunnar. Fullur af sumri, sól og tónlist og alveg einstaklega fjölmennur 

Svona hljómuðu Árstíðirnar um síðustu jól og það var alveg jafn fallegt hjá þeim í kvöld.

Athugasemdir

[Hrönn Sigurðardóttir, 9.7.2009 kl. 11:04]

Heyrúllumyndin er nánast óraunveruleg hún er svo flott og Árstíðirnar? Flott band.

[Margrét Birna Auðunsdóttir, 9.7.2009 kl. 11:14]

Takk Hrönn

En veistu hvað, við þurfum eitthvað að ala sveitunga okkar betur upp. Það komu SJÖ manns á tónleika hjá þeim á Selfossi um daginn. Hvar eru allir þessir kórsöngvarar, þegar við vorum að alast upp voru égveitekkihvaðmargir kórar á Selfossi. Svo mæta þessir dýrlegu raddsöngvarar og fólk mætir ekki. Ég skil þetta ekki.

[Ragnheiður , 9.7.2009 kl. 14:35]

flott heyrúllumyndin..

kannast ekki við árstíðir nema á dagatali en þú ert líklega ekki að tala um þær

[Birna Dis Vilbertsdóttir (IP-tala skráð) 9.7.2009 kl. 15:33]

Eins og freknótt landslag,flott mynd og flott spil

[Hrönn Sigurðardóttir, 9.7.2009 kl. 23:16]

Ertu ekki að grínast? Voru þeir með tónleika hér? Hvenær? SJÖ MANNS? Þetta er skandall!

[Margrét Birna Auðunsdóttir, 10.7.2009 kl. 13:03]

25. júní á 800 Bar.