Færsla til að hafa efst

Ég hef ekkert að segja en ég verð að skrifa eitthvað, ég get ekki haft færslu um pólitík efst á blogginu, ég verð að setja eitthvað annað inn.

En hvað svo sem? Ég fór í bíltúr í dag í nýju vinnunni, sambýlið á bíl og það er mælst til þess að hann sé notaður um helgar. Svo að ég keyrði til norðurs gegnum Hjaltastaðaþinghá og mikið er undursamlega fallegt þarna, ég hefði helst viljað vera á góninu en ekki undir stýri. Einhvern tímann fer ég þangað í myndaleiðangur, kunni ekki við það í dag með bílinn fullan af fólki að vera að stoppa í tíma og ótíma og láta þau bíða meðan ég dundaði við að finna rétt sjónarhorn. Ekki alveg minn stíll.

Á ég að tjá mig eitthvað um brunann á Þingvöllum? Ég er alltaf frekar hrifin af gömlum húsum og finnst eftirsjá þegar þau brenna. En einhvern veginn er mér alveg hjartanlega sama um Valhöll, hún var aldrei mitt hús. Það var lengst af lokað þarna, allavega varð aldrei að hefð að fá sér kaffi í Valhöll. Eða var kannski ekki lokað? Allavega fannst mér ég aldrei eiga erindi þangað. Kannski vegna sögu hússins, allavega hafði það þá áru að þetta væri snobbstaður. Það hefur mjög líklega verið það á Alþingishátíðínni 1930 en síðan eru liðin möhörg ár og margar viðbyggingar hafa bæst við. Var þetta ekki bara samansafn af skúrum með flottri framhlið?

Og með engum eldvörnum samanber svarta skýrslu sem var gefin út fyrir nokkrum árum. Ég man ekki hvað stóð í henni, ég man bara að það var undravert að þetta væri ekki löngu brunnið til grunna. Og aumingjans fólkið sem átti pantað og var rétt ókomið, það er greinilega ekki feigt því að hvernig í ósköpunum hefði átt að koma fólkinu út þegar rétt náðíst að forða nokkrum málverkum á hlaupum? Hvernig stóð á því að eldvarnaeftirlitið gaf staðnum rekstrarleyfi?

Athugasemdir

[www.zordis.com, 12.7.2009 kl. 09:08]

Notalegt að fara í bíltúr í fegurðinni. Gætir alveg stoppað og látið fólk viðra sig á góðum stöðum.

Alltaf dapurt þegar það kviknar í og gott að ekki varð manntjón. Held það bara!

[Margrét Birna Auðunsdóttir, 12.7.2009 kl. 17:20]

Það er reyndar svolítið flókið að láta þetta fólk viðra sig þar sem þau eru öll í hjólastólum. Þau fá alveg að viðra sig stundum en þá er auka mannskapur með

Já, það hafa einhverjar góðar vættir verið á sveimi yfir Valhöll þennan daginn, hvílík ótrúleg mildi að þetta gerðist þegar staðurinn var næstum mannlaus.