Þetta jarðsamband

Ég er að fara til læknis á morgun. Ekkert merkilegt, bara smá fótavandamál. Ég fer líka í sjúkraþjálfun á morgun, eitt af því sem ég lofaði sjálfri mér að gera þegar ég kæmi austur. Ég meina, hvað á það að þýða að vera með vöðvabólgu í MJÖÐMUNUM og ganga eins og gömul kona? Ég ætla líka að rölta við í apótekinu og athuga hvort þær eiga ekki fótasalt og eitthvert hressandi myntukrem sem rífur upp blóðrásina. Spurning um að auglýsa eftir fótanuddtæki. En þá gæfi ég upp símann hjá þér. Á morgun ætla ég líka að láta breyta lögheimilinu mínu, núna veit ég loksins hvar á að gera það. Og svo ætla ég að kíkja á listasýningu í Sláturhúsinu. Ég var búin að ætla mér það hvort sem var en eftir að ég kynntist listakonunum þremur í bráðhressu partíi hjá henni Dísu Maríu um síðustu helgi, þá er ekki aftur snúið. Kannski verður einhver þeirra á staðnum. Og svo ætla ég í Tölvulistann og sækja nýju tölvuna mína, þessa stóru og öflugu sem ég hef lengi þráð að eignast. Já, og svo ætla ég að koma við í Bónus.

Allt þetta eru hversdagslegir hlutir. Það eru þessir hversdagslegu hlutir sem gefa lífinu gildi.

Hlutir eins og bað við kertaljós, einn af þeim draumum sem rættust. Unaðslegt alveg bara. 

Það er gott að liggja í heitu baði við kertaljós þegar veðrið er svona drungalegt. Þetta er annar draumur sem rættist; útsýni. Þessi mynd er tekin í áttina til miðbæjar Egilsstaða, sundlaugin er lengst til vinstri og lengst til hægri glyttir í Menntaskólann. Fyrir miðri mynd, lengst í burtu, er Tjarnargarðurinn sem er víst mikill sælureitur á sumrin. Þar var mótmælafundur á laugardaginn var, sá fyrsti og kannski sá eini því að ríkisstjórnin er greinilega að falla. En fremst er bílakirkjugarður nágrannans, tveir 30 ára gamlir Range Roverar og Ford Sierra. Eins og sést er ég uppi á hæð. Alveg uppi á þriðju hæð. Og alveg með milljón króna útsýni. Eða á maður að hafa það í evrum?

Athugasemdir

[Erna María Jensdóttir, 22.1.2009 kl. 09:36]

Gott að þér líður vel á Egilsstöðum :)

[Margrét Birna Auðunsdóttir, 22.1.2009 kl. 17:02]

Hæ Erna, longtæmnósí J

á, helst vildi ég bara fá allan Gleðikórinn hingað