Breiðavíkurmyndin - pæling

Breiðavíkurmyndin var að enda á RÚV og auglýsingarnar eru byrjaðar að rúlla. Ætli það sé eitthvert samhengi milli innihalds myndarinnar og þess að fyrsta auglýsingin er frá útfararþjónustu? Nei varla, segi bara svona. Þetta er bara einhver gráglettni.

Myndin var góð og mikil vinna hefur verið lögð í að nýta brot úr heimildamyndum. Hún skilaði efninu vel. Ég hefði samt verið harðari við hann Sigga prest um það hvernig allt þetta gat farið framhjá honum, ég hefði látið hann viðurkenna að hann hefði ekkert verið að pæla í því hvernig strákunum leið.

Og svo finnst mér alltaf mesta kjötið á beinunum vera hvernig menn pluma sig í lífinu með svona reynslu í hjartanu. Frásagnir af ofbeldi hafa alltaf tilhneigingu til að renna saman og verða kerfisbundnar, þrátt fyrir tilraunir mínar til að setja mína nánustu í helstu hlutverk. Ég get bara rétt ímyndað mér Janus, Auðun, Kristófer eða Dag, systkinasyni mína sem allir eru 8-9 ára, og mátað þá við lýsingarnar frá Breiðavík. Þá fæ ég hroll. Það er úrvinnslan sem mér finnst alltaf vera merkilegasti hlutinn af frásögninni.

Ég þekkti nokkra af Breiðavíkurstrákunum þegar ég stundaði Hlemminn á unglingsárum og þeir voru harðir naglar, gríðarlegir töffarar alveg, og margir alveg á kafi í rugli. Mér fannst pínulítið vanta í frásögnina, ég hefði viljað fá meira af lífssögu þeirra sem mest var talað við, eitthvað dýpra, fylgja þeim meira eftir, tala kannski við börnin þeirra og eiginkonur, núverandi eða fyrrverandi, til að fá þeirra brot í mósaíkina.

Ég hefði líka birt nöfn allra strákanna, aldur þeirra þegar þeir voru í Breiðavík og dánarár þar sem það á við. Það kom fram í myndinni að fjórðungur þeirra er dáinn, menn sem eiga að vera á aldrinum 50-65 sirkabát. Það hefði mátt setja fram á myndrænan hátt hve þetta er hátt hlutfall miðað við jafnaldra þeirra sem ekki fóru til Breiðavíkur. Það hefði líka verið áhugavert að vita dánarorsakirnar og sjá svart á hvítu hve margir tóku líf sitt. Það hefði verið mjög sterkt.

Athugasemdir

[Birna Pála (IP-tala skráð) 4.4.2009 kl. 12:18]

Ég fæ alltaf illlt í hjartað þegar ég heyri af þessum ólánssömu drengjum. Enginn af þeim hafði gert það illt af sér að hann ætti þetta skilið.

[Margrét Birna Auðunsdóttir, 6.4.2009 kl. 06:29]

Nei, svo sannarlega.