Karíbahafsveður í haustbyrjun

Það verður Karíbahafsveður á morgun. Það er að segja, við fáum leifarnar af fellibylnum Cristobal þegar hann verður búinn að baða íbúana á Karíbahafseyjunum. Það er að verða fastur liður að við fáum fyrstu haustlægðina í kringum mánaðamótin ág/sept, í fyrra hjólaði ég í kolvitlausu veðri inn í Laugardal til að fara í söngpróf í Áskirkju, það var mikið á sig lagt til að komast í Fílharmóníuna og merkilegt að kórstjórinn skyldi ekki heillast alveg upp úr skóm og sokkum við að ég skyldi leggja svona mikið á mig, ég meina, þennan sama dag fauk tré upp með rótum við Reykjavíkurtjörn og lagðist þvert yfir Fríkirkjuveginn. En allt kom fyrir ekki, kannski var ég bara alltof andstutt eftir þetta hjólerí eða eitthvað, það bababara getur ekki veeerið að hann hafi ekki fallið fyrir röddinni minni (lesist með hneykslunarsvip). En allavega, ég var um daginn alvarlega að velta því fyrir mér að prófa í þriðja skiptið að komast inn í Fílharmóníuna þegar mér var boðið að fara í inntökupróf fyrir Hinsegin kórinn. Og á morgun ætla ég að hjóla í þessu Karíbahafsveðri inn í Laugardal til að fara á ballettæfingu. Já, í Hinsegin kórnum er nauðsynlegt að kunna ballett. Þetta verður hressandi.