Að tala eða þegja

Af hverju segjum við stundum ekki það sem okkur finnst? Hvaðan kemur eiginlega þessi hugsun að það sé betra að þegja en segja það sem manni finnst? Ég var alin þannig upp og hef oft setið uppi með að hafa ekki sagt það sem ég var að hugsa af því að ég vildi ekki stuða neinn. 

Hvað er málið með að þora ekki að stuða neinn? Gerir það manni eitthvað gott? Er ekki alltaf betra að segja hug sinn og fá umræðu um málið?

Ég las grein á dögunum um Egil Einarsson og lækaði hana því að ég var sammála höfundinum. Leiðindamál í alla staði sem sýndi vel hvað kynferðisbrotamál eru í miklum ólestri hjá okkur. Nú veit enginn hvað gerðist í raun nema þau þrjú sem voru á staðnum, eðlilega, en það sem höfundurinn vildi meina var að honum fannst Egill ekki hafa lært af hremmingum sínum.

Þetta leiddi af sér tveggja daga ritdeilu sem endaði úti í móa og ég er ennþá að spyrja sjálfa mig af hverju ég hélt alltaf áfram að svara. Það er auðvelt að þegja en það er erfitt að stöðva snjóflóð. En ef maður þegir þá fær maður heldur engin svör. Og stundum skilur snjóflóð eftir sig alveg nýtt landslag.

Svo lengi sem maður gætir þess að vera kurteis og málefnalegur og tala ekki niður til neins. Og það er ógeðslega glatað að um leið og það er nánast útilokað að sanna kynferðisbrot þá er á sama hátt nánast útilokað að hreinsa sig af slíkum ásökunum, það verður bara allt eftir á einhverju gráu svæði sem enginn fer inn á.

Allavega, ég held áfram að segja það sem mér finnst, það er betra að blása því út en brenna inni með það. Einu sinni þorði ég ekki að segja hvað mér fannst til að verða ekki óvinsæl en svo komst ég að því að það er bara kjaftæði, það er best að vera maður sjálfur. Upp á gott og vont. Og svo má alltaf skipta um skoðun. En allt er betra en að þegja.

Athugasemdir

[L.T.D. (IP-tala skráð) 28.7.2014 kl. 04:13]

Verstu lög sem mannkynið getur sett eru lög um tjáningarfrelsi einstaklinga.

Lög um tjáningarfrelsi skipulagðra hópa/fyrirtækja/auglýsinga má aldrei í lög leiða, því sá gjörningur mun alltaf geta haft í för með sér kúgun á tjáningarfrelsi einstaklinga.

Líklega er ástæðan fyrir því hvers vegna við annað hvort þegjum eða segjum miðuð út frá því hvort við viljum halda ákveðnu normi sem okkur er ráðlagt að halda í ...