Gleðidraumur, námskeiðslok og pólsk menningarhátíð

Ég vaknaði svo glöð í morgun. Ég eyddi nefnilega nóttinni í alveg yndislegum félagsskap, það er ekkert sem jafnast á við góða vini. Ég var hjá Ásdísi og Helga sem hafa bæði svo yndislega nærveru og eru alveg magnaðir kökubakarar eins og ég hef oft sannreynt. Það var einhvers konar Gleðikórshittingur og þarna var fullt af fólki, einhvers konar samruni af Skálholtsæfingabúðum og annars konar hittingum. Meðal annarra sat þarna hún Sigga Víðis, nýsturtuð með rennblautt hár og með morgunmat fyrir framan sig og blaðraði út í eitt. Mér leið svo vel í þessum félagsskap og með þá tilfinningu vaknaði ég í morgun. Það var svolítið fyndið í draumnum að ég náði mér í kornflex úr eldhússkápnum hjá Ásdísi og þar sem ég var að gæða mér á því kveikti ég allt í einu á því að sennilega hefði ég gleymt að biðja um leyfi. Það var frekar vandræðalegt augnablik, líka þó að þetta væri bara draumur. Bidda svolítið hrædd við að gera sig að fífli eða hvað

Í dag kláraði ég þriggja vikna byrjendanámskeið og í næstu viku tekur við verkleg þjálfun sem lýkur á því að ég fæ réttindi á lyftara og krana. Ég fæ reyndar líka réttindi á malbikunarvélar og loftpressu en það er aukaatriði í þessu sambandi. Ég er allavega komin með bóklegu réttindin. Og svo fékk ég líka vaktatöflu ár fram í tímann, þið getið farið að plana hvenær þið viljið heimsækja mig til Egilsstaða næsta sumar

Það er föstudagur og helgi framundan. Kannski ég nái mér í nokkra stationbauka, Bidda er farin að læra landsbyggðarslangið Og hvað ætli það sé nú???

Og núna á eftir verður pólsk menningarhátíð hér á Reyðarfirði. Fyrst tónleikar og svo verður Katyn sýnd. Ég sá hana í sumar heima hjá Gísla í boði snillinganna Aleksöndru og Marcins og hlakka til að sjá hana aftur. Virkilega áhrifarík mynd um Pólland í seinni heimsstyrjöldinni.

Annars verður bara hangið yfir sjónvarpinu yfir helgina og sofið út. Það ríkir millibilsástand á meðan ég er ekki komin með íbúðina, allavega fram að næstu Reykjavíkurferð sem verður sennilega þann 10. desember, þá verður hreinsað innan úr ónefndri húsgagnaverslun Var ekki sagt að maður ætti að halda hjólunum gangandi, ég geri allavega mitt

 

Athugasemdir

[Krunka (IP-tala skráð) 22.11.2008 kl. 00:40]

Ég hefði nú alveg verið til í að vera með þér í þessum draumi. Hafðu það gott um helgina :)

[Margrét Birna Auðunsdóttir, 24.11.2008 kl. 11:43]

Takk sömuleiðis Krunka, vonandi hefurðu haft það gott um helgina. Það er lýsandi fyrir líf mitt þessa dagana að ég er að sjá þetta núna fyrst á mánudegi, nýbúin að ryðja í mig hádegismatnum og nýti restina af matartímanum til að kíkja á netið. Svona verður þetta sennilega fram að áramótum þegar ég fer að púsla saman heimili mínu, nokkrar mínútur af og til í tölvuveri Alcoa.

[Ásdís (IP-tala skráð) 24.11.2008 kl. 14:54]

þú mátt alveg koma og fá kornfleks ekkert mál ;)

[Margrét Birna Auðunsdóttir, 24.11.2008 kl. 15:37]

Þá færi ég mig upp á skaftið og heimta frekar köku