Mánudagsmorgunn - HJÁLP!!!

Ég er ekki morgunmanneskja. Ég væri alveg til í að byrja daginn á hádegi. Það sannast á mér að aldrei skyldi seinn maður flýta sér.

Í morgun, þá átti ég að mæta á Kaffi Mílanó í mjög leynilegum erindagjörðum. Ég var búin að stefna þangað nokkrum manneskjum sem ég var beðin um og þetta var dálítið mikilvægt. Svona byrjaði dagurinn:

1. Lauk upp augunum kl. 7:30 og mundi hverju ég var búin að lofa.
2. Rauk í sturtu og tókst að brenna mig á heita vatninu og svo missti ég sturtusápuna í gólfið og braut af henni tappann.
3. Náði að þurrka á mér hárið og klessa einhverju framan í mig, náði svo strætó á réttum tíma, loksins einn ljós punktur.
4. En ég hafði sterklega á tilfinningunni að ég hefði gleymt einhverju. Svo rann upp fyrir mér þegar ég steig inn í vagninn, að síminn minn hafði orðið eftir á eldhúsborðinu.
5. Skipti um vagn hjá Ráðhúsinu þar sem stoppa þrjár hraðleiðir sem keyra Miklubrautina. Tók þá fyrstu, leið 1, settist í tóman vagninn og fór að prjóna í rólegheitunum enda langt að keyra inn í Skeifu. En hjá Kringlunni tók vagninn stefnu í Hafnarfjörðinn svo að ég mátti stökkva út og hljóp eins og vitleysingur til baka þar sem ég náði leið 6 á næstu stoppistöð, guðslifandifegin því að hafa sloppið við að lenda í Hafnarfirði.
6. Kom 10 mínútum of seint á Kaffi Mílanó þar sem liðið var að fara á taugum yfir því að ná ekki í mig. En svo hafðist þetta allt í rólegheitunum. Og síminn er kominn á góðan stað þar sem hann verður ekki viðskila við mig aftur.

Athugasemdir

[Laufey Ólafsdóttir, 22.10.2007 kl. 12:58]

Úff, kannast við svona morgna og hef lent í Mjódd þegar ég ætlaði í sakleysi að fara 2 stoppistöðvar upp suðurlandsbraut. Gat ekkert gert nema sitja af mér syndina til mjóddar og taka svo annan til baka niður á hlemm og svo annan upp suðurlandsbraut Ég hata þetta nýja kerfi með mikilli ástríðu! Hvernig á maður að muna öll þessi nýju númer???

Bara 10 mín of sein? Það telst nú varla mikið.

[Nanna Katrín Kristjánsdóttir, 22.10.2007 kl. 13:26]

Úff smá kick samt að starta vikuna svona.  Ertu hætt á næturvöktum?

[Margrét Birna Auðunsdóttir, 22.10.2007 kl. 16:46]

Já, ég hætti á þeim fyrir rúmu ári. Annars var þetta nú ekki vinnutengt, bara svona smá fjáröflun fyrir Háskólakórinn. Afraksturinn verður sýndur á gamlárskvöld

[Lilja Kjerúlf, 22.10.2007 kl. 21:59]

Úff sem betur fer þá hef ég ekki átt svona dag lengi.

Gamam að hitta þig um þarna um kvöldið og mikið rosalega sunguð þið vel

[Margrét Birna Auðunsdóttir, 22.10.2007 kl. 22:16]

Æi takk elskan, gaman að heyra það. Fyrir svona 3/4 af mannskapnum var þetta frumraun með kórnum og reyndar var þetta líka frumraun stjórnandans með okkur. En honum gekk nú bara helvíti vel að láta mannskapinn þegja á meðan við sungum

En hvernig fór skeggkeppnin?

Og eftir þennan fyrsta sprett þá gekk dagurinn alveg dásamlega, algert ævintýri.