Blessuð gamla konan

Undanfarinn hálfan mánuð eða svo hef ég ekki verið eins og ég á að mér að vera. Eina stundina er ég svo löðursveitt að það er eins og ég sé á Spáni en þá næstu er ég ísköld. Svo líður hálftími og ég er aftur orðin grilluð af hita, samt er ekkert að mér annað en þetta venjulega svefnleysi og stress. Ég hef líka tekið eftir því að letur á mörgum síðum sem ég skoðaði auðveldlega áður, til dæmis þessari, hefur núna smækkað svo mikið að ég greini það ekki nema með talsverðri fyrirhöfn. Eru þetta einhver ellimerki eða hvað?

Ég er komin í frí til 22. maí og ætla að nota tímann til að klára BA-ritgerðina. Búin að fá uppkastið til baka með fullt af gagnlegum athugasemdum og nú klæjar mig í fingurna að koma þessu frá á meðan ég man ennþá eitthvað af því sem kennarinn sagði. Alger lúxus að geta einbeitt mér að skrifum og þurfa ekki að vera á hundrað stöðum samtímis. Og ef allt gengur upp verður Biddalitla virðulegur sagnfræðingur þann 16. júní.

Ekki seinna vænna að verða fullorðin áður en ég verð algert gamalmenni.

Athugasemdir

[www.zordis.com, 30.4.2007 kl. 06:29]

Gott að ná því að verða fullorðinn áður en maður verður gamalmenni!    Gangi þér vel biddalitla, þú rúllar þessu upp.