Og af því að ég er með munnræpu í dag

enda er uppkastið komið í hendurnar á leiðbeinandanum og ég get ekkert gert fyrr en hann fellir sinn dóm annað en skrifað eins og eina heimspekiritgerð og lesið undir próf en er ekki almennilega komin í gang með það, þá verð ég bara að segja það að íslenska þjóðin er kristnari en ég hélt.

Hér eru foreldrar í stórum stíl farnir að ferma, og ég sem hélt að vígðir menn í hempu hefðu einkarétt á því. Foreldrar mínir létu ferma okkur systkinin en Siggi prestur fékk að vinna verkið. Það er greinilega eitthvað breytt núorðið.

Hér eru menn líka farnir að þjónusta til hægri og vinstri. Einu sinni var það í verkahring presta að þjónusta fólk, ég held að það hafi táknað að veita deyjandi fólki nábjargirnar en kannski hefur það átt við um öll prestverk, ég bara veit það ekki. En núna virðast allir vera hættir að þjóna og farnir að þjónusta. Ætli það hljómi eitthvað fínna?

Athugasemdir

[Svanhildur (IP-tala skráð) 18.4.2007 kl. 12:14]

Til hamingju með uppkastið! Vona að því verði vel tekið hjá leiðbeinandanum og þú fljúgir áfram með restina og klárir ritgerðina sem fyrst. Þú hristir heimspekiritgerðina fram úr erminni veit ég.

Já það er ótrúlegt hvað foreldrar eru orðnir fjölhæfir...og yfirgangssamir kannski líka því það er nánast eins og fermingarbörnin sjálf gleymist í öllu þessu amstri sem fylgir því að hafa borða, servéttur og kerti í réttum pantenelitum. Skrítið hvernig fermingarhefðin hefur þróast...svona hjá sumum í það minnsta.

 Hafðu það gott, Svanhildur