Það er engin leið að ljúga til aldurs þegar nýfædd börn eru allt í einu orðin hálfþrítug

Heyrðu, ég var að kveikja á einu. Það er 1. febrúar sem þýðir að hún Anna Berta á afmæli í dag. Hún fæddist árið 1984, daman er bara orðin 25 ára! Almáttugur, núna finnst mér ég vera gömul

Anna Berta er dóttir hennar Erlu vinkonu sem var bara rúmlega tvítug stelpa þegar hún uppgötvaði að það var farþegi innanborðs. Systur hennar báðar voru háóléttar og kannski hefur þetta bara verið svona smitandi. Það var þó sá munur á að þær voru í sambúð með barnsfeðrum sínum en hún ekki. Þannig að í hönd fór mikið basl einstæðrar móður sem gat lítið sótt til sinna nánustu. Sem besta vinkona tók ég virkan þátt í þessu öllu saman og tengdist litlu skottunni sterkum böndum. En svo gerðist það sem stundum gerist, að við Erla fórum hvor í sína áttina. Það þýddi auðvitað að ég gat ekki lengur fylgst með Önnu litlu.

Og í dag þekki ég hana ekki neitt, veit ekkert hvað hún er að gera í lífinu. Ætli hún hafi menntað sig, er hún kannski komin með fjölskyldu? Ekki veit ég. Ég óska henni bara alls hins besta og vonandi nýtur hún afmælisdagsins.

Athugasemdir

[Ragnheiður , 1.2.2009 kl. 18:23]

Sko, ég var að enda við að lenda í sömu krísunni, fór á alþingisvefinn til að kynna mér afmælisbarn dagsins Katrínu Jakobsdóttur og varð alveg klumsa...hún er fædd fermingarárið mitt

Hvar fáum við fölsuð fæðingarvottorð ?

[www.zordis.com, 2.2.2009 kl. 09:14]

Dásamlegt hvað tíminn líður og við lærum og eldumst! Að kvöldi skyldi daginn þakka.

Lífið er núna í þeirri dásamlegu hugsun sem býr í hjartanu. Ung og falleg um fertugt!

[Margrét Birna Auðunsdóttir, 2.2.2009 kl. 11:48]

Aldur er hugarástand, það hef ég oft sagt. Ég hangi á því

[Birna Dis Vilbertsdóttir (IP-tala skráð) 2.2.2009 kl. 12:10]

[Margrét Birna Auðunsdóttir, 2.2.2009 kl. 16:46]

Og eitt enn, ég á vinkonur, og líka vini reyndar, sem verða 25 ára á þessu ári. Aldrei hef ég pælt í því að þetta fólk væri jafngamalt þessu litla stelpuskotti sem hún Anna Berta eitt sinn var. Það er sem ég segi, aldur ER hugarástand. Punktur.